2017- 2019

Skýrsla stjórnar Félags félagsfræðikennara í framhaldsskólum
tímabilið 28. apríl 2017 – 17. maí 2019

Góðir félagar.
 
Í upphafi þessa fundar þætti mér vænt um að við minntumst fallins félaga.
 
Jónína Helga Þórólfsdóttir fæddist í Reykjavík 8. janúar 1971 og lést þar 29. janúar á þessu ári aðeins 48 ára gömul.
 
Ég var svo heppinn að fá að starfa með Jónínu en hún var í æfingakennslu hjá mér skólaárið 2009-2010.  Hún var metnaðarfullur kennari, gagnrýnin á eigin kennslu og náði góðu sambandi við nemendur.
 
Hún sótti sumarnámskeiðið hjá okkur síðast á síðasta ári og nokkur ykkar þekktuð hana vegna kennslu hennar en eftir kennsluréttindin hóf Jónína kennslu við Menntaskólann á Akureyri og frá haustinu 2012 kenndi hún við Menntaskólann við Sund. Við stöndum upp og minnumst Jónínu með einnar mínútu þögn.
 
Síðasti aðalfundur félagsins var haldinn 28. maí 2017 í FÁ. Björk lagði fram  ársreikninga og voru þeir samþykktir með öllum greiddum atkvæðum. Hannes las upp skýrslu stjórnar.
 
Í stjórn félagsins voru endurkjörin Hannes Í Ólafsson FÁ, Björk Þorgeirsdóttir, Kvennó og Guðmundur Gíslason FG.
 
Þórunn Steindórsdóttir og María Ben Ólafsdóttir voru kjörnar í varastjórn.
 
Undir liðnum önnur mál var endanlega samþykkt að félagið gerðist aðili að Euroclio, samtökum evrópskra sögu- og félagsgreinafélaga og rætt var um stöðu fagfélaga KÍ eftir að ríkið tók styrki af þeim.
 
Fyrir aðalfundinn var ráðstefna þar sem sagt var frá væntanlegu sumarnámskeiði á Kúbu. Auk þess fjallaði Tinna Þórudóttir Þorvaldar um menningu og stjórnmál á Kúbu og Hjördís Þorgeirsdóttir fjallaði um virkni og ábyrgð nemenda í námi sínu
 
Fyrsti fundur stjórnar var haldinn 17. maí. Stjórnin skipti með sér verkum: Hannes formaður, Björk gjaldkeri og Guðmundur ritari.
 
Á tímabili núverandi stjórnar hafa verið haldnir sjö skráðir stjórnarfundir og nokkrir óskráðir.
 
Helstu verkefni stjórnarinnar voru:
 
Skipulagning ráðstefna og námskeiða:
Skipulagning sumarnámskeiðs á Kúbu 2.-9. júní 2017. Þátttakendur voru 23. María Hjálmtýsdóttir vann með stjórn félagsins að skiplagningu og framkvæmd námskeiðsins.
Vinnustofa um mannréttindakennslu og flóttamenn, Kvennaskólanum 10. nóv 2017. Vala Ósk Bergsveinsdóttir fræðslustjóri Amnesty á Íslandi kynnti kennsluefni um mannréttindi og flóttafólk.
Skipulagning sumarnámskeiðs 13.-14. ágúst 2018. Hnattvæðing og margbreytileiki, námsgögn í félagsgreinakennslu og afbrot í íslensku samfélagi. Fyrir utan fjóra fyrirlesara utan félagsins þá unnu þátttakendur í vinnustofum við að setja kennsluefni á heimasíðu félagsins.

Skipulagning ráðstefnu með Félagi félagsfræðinga 30. nóvember 2018. Björk Þorgeirsdóttir mætti fyrir hönd okkar félags með nemendur úr Kvennó en öll sögðu þau frá reynslu sinni af félagsfræðikennslu í framhaldsskóla.

Skipulagning ráðstefnu um stéttamun í íslenskum skólum en ráðstefnan var haldin nú á undan aðalfundi 17. maí. Aðalfyrirlesari var Berglind Rós Magnúsdóttir.

Skipulagning þessa aðalfundar í dag 17. maí.

Skipulagning sumarnámskeiðs sem haldið verður 12. og 13. ágúst 2019. Fjallað verður um Faglegar og tæknilegar nýjungar í kennslu félagsgreina

Stjórn félagsins hefur auk þessa fengist við að sækja um styrki frá Rannís vegna ferða sem ætlaðar eru fyrir stjórnarmenn til að sækja ráðstefnur erlendis. Þannig fóru formaður félagsins og heiðursformaður þess á ráðstefnu Euroclio í Marseille 2018 og formaður og varamaður í stjórn fóru til Gdansk á þessu ári, 2018.

Unnið hefur verið við að setja efni á heimasíðu félagsins og að uppfæra félagatal. Sú vinna hefur að mestu legið á gjaldkera félagsins, henni Björk.

Fyrir utan starf stjórnar við félagsfundi, ráðstefnur og námskeið þá hefur hún rætt um stöðu kennslu í félagsfræði og stjórnarmenn hafa árlega sótt fund með skólamálanefnd Félags framhaldsskólakennara. Þannig fór Hannes á slíkan fund árið 2017, Björk árið 2018 og Guðmundur er nýkominn frá slíkum fundi fyrir árið 2019. Formaður félagsins sækir svo árlega fræðslufund Samstarfsnefndar um endurmenntun framhaldsskólakennara.
Starfið í félaginu er ekki aðeins á herðum stjórnarinnar. Aðrir félagar hafa komið að undirbúningi ráðstefna og endurmenntunarnámskeiða.

Helstu verkefni sem bíða komandi stjórnar snúa að fjármálum. Fram til ársins 2016 fengu fagfélög framhaldsskólakennara árlega styrk frá menntamálaráðuneytinu. Eftir að þessi styrkur var aflagður þarf félagið að huga að því hvernig afla skuli peninga til starfseminnar. Þar erum við með kostnað vegna fundarhalda en þó mest vegna glæsilegrar heimasíðu okkar.

Nú er svo komið að allir stjórnarmenn hætta störfum fyrir félagið.

Guðmundur Gíslason tók við starfi ritara félagsins í september árið 2014 þegar þáverandi ritari hætti í stjórninni. Hann hefur starfað meira en tvö  kjörtímabil í stjórninni.
 
Björk Þorgeirsdóttir var fyrst kosin í stjórn árið 2002 og starfaði þá sem ritari en tók að sér starf gjaldkera á næsta aðalfundi árið 2003. Hún hefur þannig starfað 17 ár í stjórninni og flest árin í erfiðu gjaldkerastarfi. Frá upphafi hafa aðeins tveir stjórnarmenn starfað lengur fyrir félagið.
 
Hannes Ísberg Ólafsson var fyrst kosinn í stjórn félagsins árið 1994 og hefur starfað sem meðstjórnandi, ritari og svo formaður félagsins frá árinu 2005. Hann hefur því starfað í stjórn félagsins í 25 ár eða lengur en nokkur annar. Hann hefur verið formaður félagsins í 14 ár en aðeins heiðursformaðurinn, Garðar Gíslason, hefur starfað lengur eða í 15 ár.
 
Fyrir utan stjórn félagsins þá hættir einnig Erlingur Hansson sem endurskoðandi félagsins. Hann hefur verið endurskoðandi lengur en elstu heimildir ná til.
 
Mér þykir rétt að við gefum endurskoðanda og fráfarandi stjórn gott klapp fyrir þeirra starf.
 
Reykjavík, 17. maí 2019
Hannes Í Ólafsson